Lettre n° 13

18/02/1530 [18/02/31]

<29 recto>
Remission pour Pierre Thoby, homme de labeur
demourant en la parroisse de Ploemodiern, la
verificacion a Keremper-Corentin dont la teneur
cy apres ensuilt.
[1] Francois, etc, a tous presens et a venir, savoir faisons nous avoir
[2] receu l'humble supplicacion et requeste des femme, parents et amys
[3] consanguins de Pierre Thoby, pouvre laboureur a present detenu es
[4] prinsons de notre court et barre de Kerempercorentin, Contenant que comme
[5] a ung jour durant les octaves* de Pasques dernieres, ledit Thoby
[6] eust mys du blé en paille sur l'aire du lieu et estaige avec
[7] ou il demouroit ou villaige de Lessonyer en la parroisse
[8] de Ploemodiern et l'eust faict baptre et escouvre le grain
[9] de la paille ayant en sa main ung instrument de boys
[10] que aucuns appellent roseul amassant ledit blé escouz
[11] de ladite paille pour le devoir evanter. Sourvint illecques
[12] apres medi et avant soulleil couché ung nommé Jehan
[13] Moreau, compere audit Pierre Toby, quel Moreau estoit
[14] marié a Katherine Thoby, seur dudit Pierres, demourant deux
[15] ans y avoit et plus ailleurs que oudit village de Lessonyer,
[16] print iceluy Moreau ung ballay avec lequel s'avancza de
[17] son auctorité et par mallice comme est vroysemblable
[18] amasser ledit blé quel n'estoit sien et baillayer ladite <29 verso>
[19] aire. Quoy voyant, ledit Thoby celuy prejudicier
[20] et que ledit Moreau sans cause ne raison le voulloit
[21] impescher sur la jouissance et possession de sondit blé luy
[22] dist soy retirer et lesser ledit blé, quel Moreau luy
[23] respondit qu'il avoit autant oudit lieu et estaige ou
[24] demouroit ledit Pierres Thoby que iceluy Thoby ne
[25] delaissant tousiours a amasser ledit blé. Et sur
[26] ledit differant et parrolle rixeuses qu'ilz eurent ensemble
[27] ledit Thoby pensant oudit roseul qu'il tenoit entre
[28] ses mains amassant sondit blé, frappa sur les espaulles
[29] ledit Moreau, l'actaignist sur la teste et luy fist sang
[30] et playe a l'occasion duquel coup ledit Moreau soy retira
[31] a sa maison. Et le lendemain, ainsi que ouyt dire ledit
[32] Thoby, par faulte de bon pensement ou aultrement, alla
[33] de vie a deceix. A raison de quoy, craignant ledit
[34] Thoby estre aprehendé de justice, delaissa sa maison
[35] ou il demouroit et se abcenta jucques sur la fin
[36] du moys de janvier derroin qu'il retourna en sa maison
[37] esperant appoincter touchant ledit cas o les veusfve
[38] et herictieres dudit decedé et lors fut veu et aprehendé
[39] par nos officiers dudit Kerempercorentin et constitué prinsonnier
[40] oudit lieu ou il est a present detenu. Nous remonstrans
[41] oultre lesdits supplians que lesdits Moreau et Thoby n'avoint
[42] jamais eu question ne differant ensemble et estoit
[43] ledit Thoby auparavant ledit cas impremedité et ainsi de
[44] malle fortune avenu, home de bien, de bon rest et gouvernement,
[45] hantant les eglises, foires, marchez et bonnes compaignies sans
[46] avoir esté aucunement reproché ne actaint d'aucun
[47] mauvaix cas, vivant honnestement de son travail et
[48] labeur de terre, il sa femme ensfens et mesnaige
[49] et craignent iceulx supplians que, a raison dudit
[50] cas, soit contre luy procedé par nos officiers dudit Kerempercorentin
[51] a rigueur de justice qui leur reddevoit a grant
[52] honte perte et dommaige. Nous supplians qu'il nous
[53] plaise a tout ce que dessus avoir esgard et dudit
[54] cas impartir audit Pierres Thoby, nos lettres de grace
[55] remission et pardon, tres humblement le nous requerans.
[56] Pourquoy etc.

Darande

Rémission pour Pierre Thoby

Registre B33 Lettre n° 13

18/02/1530 [18/02/31]