Lettre n° 35

05/07/1531

<120 verso>
Remission pour Henry Kernenez, Sr
de Coesclan, de la parroisse de Melrant ou
diocese de Vennes.
[1] Francois, etc, a tous presens et advenir, salut.
[2] Savoir faisons, nous avoir receu l'humble suplicacion des[sic]
[3] et requestes des parens et amys consanguins de notre subgect
[4] Henry Kernenez, Sr de Coesclan de la paroisse de Melrant
[5] ou diocese de Vennes soulz notre juridiction de Ploermel, Contenant
[6] que ou moys de may dernier, ledit Kernenez soy trouva
[7] ou bourg de Saint Nicolas en laparoisse de Plomiliau
[8] soubz notredite juridiction de Ploermel, et apres avoir ouy la
[9] messe et faict sa devotion en l'eglise dudit Saint Nicolas,
[10] s'en alla en la maison de Jacob Lebriz tenant taverne
[11] oudit bourg ou illec en compaignye dudit Lebriz et
[12] sa femme se assist a table avec. Lors arriva dom Jehan
[13] Gefrezo qui beut avec eulx et a ce que ledit Kernenez
[14] dist audit Grefezo telles ou semblables parolles : « Poyez pinte ! »
[15] L'en reffuza ledit Gefrezo et en l'instant ung nommé
[16] Laurrens Guilloux, cordonnier, dist audit Kernenez :
[17] « Pourquoy poyroit-il pinte ? Lesses-le ! » Et lors ledit
[18] Kernenez sortit hors ladite table disant audit Guilloux :
[19] « De quoy te mesle-tu, villain ? Tu as tousiours affaire
[20] ou moy : je te le randray ! » A quoy ledit Guilloux, esmeu,
[21] de mauvaix couraige, vers ledit Kernenez comme par les
[22] parolles cy-apres dist bien apres supposer, dist audit Kernenez :
[23] « Tu es ung beau napleux prodigue ! » Et cuydant fraper
[24] ledit Kernenez, luy tira deux coups de pierre. Et bien
[25] tost apres rentra ledit Kernenez en ladite maison et
[26] veit ledit Guilloux auquel il dist icelle ou semblables
[27] parolles : « Veulx-tu poyer pinte de vin ? » Lequel Guilloux
[28] respondit : « Ouy, si je avoys argent ! » Et ledit Kernenez luy
[29] dist : « Vient-en doncqs ! » Ce que differa fere si ledit Kernenez
[30] n'eust osté son couteau. Sur quoy ledit Kernenez bailla
[31] son espee a ung sien homme de pié qui estoit ou luy
[32] et apres ledit Guilloux alla boyre avec ledit Kernenez
[33] et beut o luy et eulx estans a boyre en ladite maison <121 recto>
[34] illecq survint le recteur de Plouray qui demanda a boyre
[35] et lors se leverent les asistans a ladite table et
[36] pour ce que iceluy Guilloux faisoit contenance d'estre
[37] courocé contre ledit Kernenez, craignant ledit kernenez
[38] que ledit Guilloux quel estoit homme robuste, debatiff,
[39] scandaleux et dangereulx et plus fort et puissant
[40] que ledit Kernenez ne luy eust faict quelque desplaisir,
[41] a raison que desia luy avoit rué deux coups de pierre,
[42] demanda son espee a son serviteur, ce que iceluy serviteur
[43] reffuza une foiz luy bailler. Et lors ledit Kernenez
[44] dist a sondit serviteur : « Veux-tu que je aille salluer ung
[45] gentilhomme sans mon espee ? » Parlant celuy Kernenez
[46] dudit recteur de Plouray qui illecq estoit arrivé comme dist
[47] est. Et apres avoir celuy Kernenez recouvert sadite espee,
[48] esmeu et courocé des injures que ledit Guilloux luy
[49] avoit dit et des deux coups de pierre que luy avoit gecté
[50] et aussi craignant que iceluy Guilloux n'eust mys son
[51] premier voulloir a execucion, ledit Kernenez quel
[52] lors estoit emboité de vin, tellement qu'il avoit
[53] presque perdu le sens et entendement, sans avoir voulloir
[54] ne espoir de tuer ledit Guilloux, frappa ledit Guilloux
[55] ung coup de sadite espee au travers du corps diceluy
[56] Guilloux, tellement que dedans deux heures apres ledit
[57] Guilloux alla de vie a deceix, que vint a notice dudit
[58] Kernenez qui estant fort deplesant de ce cas, il est bien
[59] a croire, dist a ceulx qui estoint ou luy : « Menez-moy a la justice ! »
[60] Et incontinent, il fut prins et mesné es prisons de
[61] Pontivy ausquelles depuis il a esté par les officiers de ladite court
[62] interrogé sur ledit cas qu'il a confessé liberallement et veullent
[63] lesdits officiers pour raison diceluy cas proceder a rigueur
[64] de justice. Si nous ont lesdits suplians remonstré qu ledit Kernenez
[65] est jeune gentilhomme de le age de xx ans ou envyron ataignant
[66] de lignage a pluseurs gentilhommes et grans personnages de cedit pays,
[67] doulx et paisible, sans jamays avoir esté actaint ne convaincu d'aucun
[68] mauvaix ne villain cas et ledit Guilloux estoit homme de basse condition
[69] rumoreulx, querelleux et debatiff. Nous supliant qu'il nous plaise dudit
[70] cas impartir et octroyez oudit Kernenez, noz lettres de grace, remission et
[71] pardon, tres humblement, le nous requerant. Pourquoy nous, etc.

Derien

Rémission pour Henry Kernenez

Registre B33 Lettre n° 35

05/07/1531