Lettre n° 56

26/10/1531

<195 recto>
Remission pour Pierres Le Sellier, la verificacion
aux seneschal et alloué de Rennes.
[1] Francois, etc, a tous presents et advenir, savoir faisons, nous avoir receu l'humble supplicacion
[2] et requeste des parens et amys consanguins de notre pouvre subgect Pierres Le Sellier, pouvre
[3] homme de l'art et mestier de menuserie de la paroisse de Myniac pres Becherel ou diocese
[4] de Saint Mallo, chargé de femme et enfent, Exposans que comme envyron troys ans par diverses
[5] foiz, ledit Le Sellier avoit esté a besougner de sondit art de menusier et en aultres choses
[6] licites et honnestes a la maison de Jehan André, demourant en ladite parroisse de Myniac
[7] et que ledit André pour ses sallaires fust redevant audit Le Sellier de la somme de quarante soulz
[8] ou envyron de fere poyement. De quoy ledit André avoit esté reffusant, et doutant ledit Sellier que
[9] s'il eust mys ledit André en proceix en demande desdits sallaires, a l'occasion que ledit André qui
[10] est cler, riche et puissant sellon son estat, et ledit Sellier soit pouvre homme, il n'eust
[11] peu avoir raison dudit André pour la longueur qui eust peu estre a la conduicte du
[12] proces et que ledit Sellier n'eust peu froyer a la myse diceluy, ledit Sellier envyron ung
[13] moys dernier de nuyct print et aprehenda l'un des chevaulx dudit André en ugne
[14] pasture et reconduisit et mesna au desceu dudit André en la ville de Combour a distance
[15] dudit Myniac de troys a quattre lieux et l'exposa [?venal?]. Et sur la suspeczon qui fut
[16] sur ledit Sellier d'avoir robé ledit cheval, fut par les officiers dudit Combour constitué prinsonnier
[17] et interrogé dudit cas de larronery de cheval de quoy il fut desment. Et depuis sur la torture
[18] luy presentee en a esté confessant et par informacion que ledit André a fecte, ledit cheval luy apartenir
[19] de celuy André recouvre ledit cheval. Si nous remonstrent lesdits exposans que ledit Sellier par ladite
[20] court de Combour, combien qu'il n'en soit subgect que par la tractacion dudit cheval, a esté arrogé
[21] par le procureur dudit Combour d'avoir puis dix ans derniers a tout ung baston a deux boulz esgrené en
[22] terre quelques javelles de blé noir en une pieze de terre situee en la paroisse de La
[23] Bausaine que possedoit Morice Hointe, est-il que ladite piece de terre estoit litigieuse entre
[24] lesdits Hointe et Sellier et icelle ledit Sellier pretendoit luy apartenir et voyant qu'il ne
[25] povoit frayer a la mise de la conduicte dudit proces et a ceste cause luy convenoit
[26] icelle piece de terre habandonner et perdre celuy Sellier qui n'a le cerveau du tout assuré
[27] tout en fureur, se transporta en icelle piece de terre et de sondit baston a deux boutz esgrena
[28] quelques javelles du bled noir qui avoit creu en icelle piece de terre. Et doubtent lesdits exposans
[29] que les officiers dudit Combour veillent proceder pour ledit cas a rigueur contre ledit Sellier qui leur cederoit
[30] a grant deshonneur, [?soulle?] et scandal, et d'une belle et honneste jeune fille qui ledit Sellier de le asge
[31] d'envyron vingt ans en terme de marier, et de la femme et famille dudit Sellier lesquelles auparavant
[32] ladite detention celuy Sellier nourissoit de ce qu'il povoit guaingner de sondit mestier qui seroint contrainctz
[33] aller mandiquer leur vie. Nous supplians qu'il nous plaise en l'honneur de dieu et de sa passion, veu que ladite prinse
[34] de cheval faicte par ledit Sellier en soy poyant de son sallaire et la mauvaise saison de cherté qui regne
[35] maintenant, octroyez audit Le Sellier noz lettres de grace, remission et pardon desdits cas tres humblement les nous requerans. Pourquoy, etc.

Darande

Rémission pour Pierres Le Sellier

Registre B33 Lettre n° 56

26/10/1531