Lettre n° 60

06/12/1531

<213 recto>
Remission pour Jullien Fontenay, la verificacion
au seneschal de Ploermel.
[1] Francois, etc, savoir faisons, nous avoir receu l'humble
[2] supplicacion et requeste des femme, enfans et parens et amys consanguins
[3] de Jullien Fontennay, pouvre homme a present detenu prinsonnier es
[4] prinsons chateau de Montfort, Contenant comme le vendredy
[5] tiers jour de novembre derroin qu'estoit le jour et feste de mon Sr
[6] Saint Gobrien que on deprye en l'eglise parrochial de Saint Gonllay
[7] en l'evesché de Saint Malo, ledit Fontennay seroit allé a ladite
[8] eglise pour ouyr le service divin et fere sa priere et oraison. Et
[9] apres y avoir esté, s'en alla celluy Julien Fontenay en la
[10] compaignie de Jehan Morel, Jehan Coste, Jehan Chanterel
[11] et Jehan Gourel en la maison de Marie Cori, veufve
[12] de feu Jehan Guerin tenant maison et taverne oudit bourg,
[13] prandre sa reffection avecques lesdits nommez ce qu'ilz firent
[14] assemblement ou cellier dicelle maison. Et puis avoir
[15] compté et poyé ladite veufve de ce qu'ilz avoient despencé <213 verso>
[16] a celle heure, beurent encores en ladite maison lesdits nommez
[17] et ledit Julien Fontennay en la compaignie de la veufve,
[18] Jehan [??] de Roy, Guillaume Regnier et aultres sans debat ne
[19] querelle avoir entre eulx et descendirent ou jardin dicelle
[20] maison et beurent encores troys ou quatre potz de vin. Et
[21] bientost apres ledit Jehan Fontennay ouyd dom Pierres
[22] Pieron et ledit Jehan Morel qu'ilz avoient ensemble
[23] parrolles rumoreuses et debatifves, et alla
[24] ledit Julien veoir que c'estoit et aperceut ledit dom
[25] Pierres qui saignoit du neix et pourtant que ledit
[26] Julien cuydoit et eut suspeczon que ce eust esté
[27] ledit Morel qui eust blezé ledit dom Pierres, ledit
[28] Julien print ledit Morel luy disant : « Allon-nous
[29] en ! que voullez-vous fere ? » Et ainsi que ledit Jullien passoit
[30] par devant ladite maison, ung nommé Guillaume Louyez
[31] avecques lequel ledit Julien n'avoit jamais eu
[32] debat ne querelle, donna audit Jullien ung souflet
[33] en le boutant tellement qu'il tomba a terre. Et quant
[34] ledit Julien fut relevé, il dist audit Guillaume Louyez :
[35] « Que m'as-tu [sic] ? Je ne te demande rien. » Et s'en alla celluy
[36] Julien ou jardin de ladite maison et tira ung petit
[37] cousteau qu'il avoit pendant a sa seincture et
[38] s'en retourna hors ledit jardin cuydant s'en aller
[39] et trouva encores ledit Guillaume Louyez au-devant
[40] de ladite maison et incontinent ledit Louyez vint
[41] au-devant et ce voyant dist ledit Julien : « Guillaume,
[42] que m'avez-vous ? je ne vous demandoys rien ! » A quoy
[43] respondit ledit Louyez : « Tu en auras encores ! » Et s'entre-
[44] joignirent et en celluy conflict, ledit Julien
[45] Fontennay donna deux coups dudit petit cousteau <214 recto>
[46] audit Louyez l'un en la poictrine et l'autre au derriere, ne
[47] sceurent lesdits supplians en quel endroit. A l'occasion desquelz
[48] coups, ledit Guillaume Louyez cheut a terre et perdit beaucoup
[49] de son sang et incontinent ledit Julien s'en [sic]au cymytiere
[50] dudit bourg et entra en l'eglise dudit lieu de Saint
[51] Gonllay. Et depuis desirant parler audit Louyez, sortit
[52] hors ladite eglise et cymitiere et alla parler audit Louyez
[53] en la maison de ladite veufve en laquelle il fut
[54] prins et constitué prinsonnier oudit chateau de Montfort
[55] ouquel il est detenu et a ouy dire que dedans dix
[56] jours apres ledit Louyez par deffault de bon pensement
[57] ou autrement estoit mort et decebdé. A l'occasion duquel
[58] cas et crime lesdits supplians craignent qu'on veille
[59] vers luy procedé a rigueur de justice, nous
[60] remonstrans que ledit Julien Fontennay a esté tousiours
[61] bien vivant, doulx et paisible sans jamais avoir
[62] eu querelle ne debat, reprins ne accusé d'aulcun
[63] mauvais cas et ledit feu Loyez, rumoreux et
[64] debatif et coustumier de prandre querelles et debatz.
[65] Nous supplians lesdits femme, enfans, parens et amys
[66] impartir noz lettres de grace, remission et pardon audit
[67] Julien dudit cas, tres humblement, les nous requerans.
[68] Pourquoy nous, etc.

Darande

Rémission pour Jullien Fontenay

Registre B33 Lettre n° 60

06/12/1531