Lettre n° 66

16/12/1531

<224 verso>
Remission pour Jehanne Jamier, la verificacion dirigee
au seneschal de Rennes dont la teneur ensuilt.
[1] Francois, etc, a tous presens et a venir, savoir faisons, nous avoir receu l'humble supplicacion
[2] et requeste des parens et amys consanguins de Jehanne Jamier, femme Yvon Baron,
[3] barbier, Contenant que environ la fin du moys d'aoust derroin a ung jour de sabmedy ,
[4] sur le vespre dudit jour, une nommee Jehanne Herny s'en allant amont
[5] la ville de Redon vers l'eglise Saint Saulveur passant au-devant la maison
[6] demeuroint lesdits Baron et sa femme, ledit Yvon Baron sortit hors de sadite
[7] maison ayant en l'une de ses mains une petite mandoce disant a ladite
[8] Jehanne Herny quelques parolles la menaczant, a raison de quelques
[9] autres parrolles injurieuses que auparavant icelle Jehanne Herny avoit dictes
[10] et proferois dudit Baron et de ladite Jehanne Jeamier, sa femme. Et lors soy
[11] retira ladite Jehanne Herny en l'oupvrouer de la maison d'un nommé Thomas Dabel
[12] illec pres estant. Et apres ledit Le Baron soy estre retiré chez luy sans
[13] exceix fere a ladite Jehanne Herny, sortit ladite Jehanne Jamié laquelle
[14] couroucee et desplaisante des injures luy rapportees que ladite Jehanne
[15] Herny avoit proferees d'elle et sondit mary, et aussi que l'on disoit
[16] en la rue ou ilz demouroient que ladite Jehanne Herny avoit faict
[17] nagueres ung enfant par le faict et atouchement charnel que
[18] avoit eu sondit mary o ladite femme Herny, entra ladicte <225 recto>
[19] Jehanne Jamier en la maison dudit Dabel ou estoit ladite Jehanne Herny, et
[20] a son arrivee donna ung coup de main sur la teste de ladite Jehanne Herny
[21] laquelle en l'instant et de soy mesmes se heurta sa teste contre la
[22] muraille du l'oupvrouer et maison dudit Dabel. Et tout incontinent
[23] et sans aultre exceix avoir faict ladite Jehanne Jamier yssit et sortyt hors ladite
[24] maison et soy retira ches elle, ne penczant avoir autrement excedé
[25] ladite Jehanne Herny quelle bientost apres s'en yssit hors ladite maison
[26] dudit Dabel sans en elle aparoir blesseure, playe ny sang qui ains
[27] comme saine alla a ses afferes. Dempuix quoy au lendemain dudit jour ou bien
[28] le lundy ensuyvant ladite Jehanne Herny tomba au lict malade en laquelle
[29] maladie elle fut par le temps de seix ou sept jours et dicelle maladie
[30] decebdé. A occasion duquel deceix intervenu dedans les quarante jours apres ledit
[31] debat, les officiers et gens de justice dudit Redon inferent et veullent inferer
[32] que ladite Jehanne Jamier est cause et moien de la mort de ladite Jehanne Herny,
[33] et craignant ladite Jehanne Jamier rigueur de justice s'est rendue fugitife
[34] et en franchise hors la juridiction dudit Redon et ont esté ses biens meubles
[35] saesiz. Nous remonstrans lesdits supplians que ladite Jehanne Jamier a esté tousiours
[36] bien nommee et estimee de bon rest et gouvernement sans aulcunement avoir esté reprochee
[37] d'aulcun villain ne maulveix cas et est chargee de enfans myneurs et soubz bas
[38] aige. Et a ceste cause, nous ont supplié et requis qu'il nous plaise avoir esgard
[39] et dudit cas impartir et octroyer a ladite Jehanne Jamier noz lettres de grace,
[40] remission et pardon sur ce convenables, tres humblement, nous requerans
[41] icelles. Pourquoy nous, etc.

Rocaz

Rémission pour Jehanne Jamier

Registre B33 Lettre n° 66

16/12/1531