Lettre n° 11

06/03/1531 [06/03/1532]

<49 verso>
Remission pour Olivier Le Comte, la verificacion au sennechal de Ploermel.
[1] Francois, etc, a tous presens et advenir,
[2] savoir faisons, nous avoir receu l'humble supplicacion
[3] et requeste des femme, enfans et amys consanguins
[4] de notre pouvre subgect Olivier Le Comte de la
[5] parroisse de Baignon, Contenant que le dimanche
[6] sixiesme jour de febvrier l'an mil vcxxix
[7] et quequessoit environ celluy temps, ledit
[8] Le Comte et sadite femme feussent allez de leur
[9] maison et demeurance a l'eglise parrochial
[10] dudit Baignon pour y ouyr la grant messe
[11] et divin service, et apres icelle avoir ouye, s'en
[12] allerent en la maison de Jehan Rolland et <50 recto>
[13] feue Jehanne Plesseix, sa femme, estant audit bourg
[14] y tenans lors hostellerie et vin en vente, en
[15] laquelle maison y avoit ledit jour nopces et
[16] assemblee de gens, ou ilz disnerent et prindrent
[17] leur resfection en presence et compaignye de plusieurs
[18] gens de ladite parroisse. Et apres qu'ilz eurent
[19] compté et poyé ce qu'ilz avoient despendu, ledit
[20] Le Comte fist venir une pinte de vin et pour
[21] poyement de laquelle il bailla ung unzain
[22] a ladite Jehanne Plesseix. Et depuix estans
[23] ceulx Le Comte et sadite femme en compaignie
[24] de Jehan Rolland, Michel Teixier et plusieurs
[25] autres faisans ung mariage d'une fille dudit
[26] Jehan Rolland avecques ledit Michel Texier, et
[27] en l'endroit ledit Le Comte heurta de sa main ung
[28] voyre qui estoit tumbé sur la table ou ilz
[29] bevoint et rompit ledit voirre ; et alors
[30] ladite Jehanne Plesseix dist audit Le
[31] Comte : « Tu romps les voirres comme s'ilz ne
[32] te coustoint riens ! » et ledit Le Comte luy respondit :
[33] « Tu ne fays pas cas de prandre unze deniers
[34] pour une pinte de vin qui ne vault que
[35] huit ! » Et depuis environ l'heure de dix ou unze
[36] heures du soir comme lesdits Ollivier Le
[37] Comte et sadite femme voullurent s'en aller,
[38] ilz demanderent a ladite Jehanne Plesseix
[39] troys deniers de retour de l'onzain que ledit Le
[40] Comte avoit baillé pour ladite pinte de vin
[41] qu'ilz avoint beue ainsi qu'est devant declairé,
[42] disans que autre chose ne les tenoit qu'ilz ne
[43] s'en alloint. Et lors, ladite Jehanne Plesseix <50 verso>
[44] tira de sa bourse ung denier et le voullut
[45] bailler audit Le Comte en luy disant : « Allez-
[46] vous en ! vous avez rompu des voirres. »
[47] Quel denier ledit Le Comte reffusa prandre
[48] et dist qu'elle s'en repentiroit si elle ne luy
[49] bailloit son retour, et a l'heure ladite Jehanne
[50] Plesseix demanda audit Le Comte par telles
[51] parrolles : « As-tu mitz cousteaulx ? » Quel le Comte
[52] respondit : « Ouy, qui te cuydera ! » Et sur ce et le
[53] debat dudit retour sourdit entreux plusieurs
[54] parolles de rumeur et injures, s'entre-
[55] appellans la femme dudit Le Comte et ladite Jehanne
[56] Plesseix : « Putains ! Faulces [?vesses?] ! » et aultres plusieurs
[57] injures et perseverent ladite Jehanne Plesseix
[58] en sesdites injures, bouta et mist rudement et par force lesdits
[59] Le Comte et sadite femme hors de ladite maison.
[60] Et estans ledit Le Comte et sa feme hors,
[61] ledit Le Comte quel estoit eschausfé et
[62] emboyté de vin, estant irrité et courroussé
[63] desdites injures que luy disoit et a sadite femme
[64] ladite Jehanne Plesseix et qu'elle ne luy voulloit
[65] bailler le retour de sondit onzain, en l'instant
[66] tira ung petit cousteau qu'il portoit a sa
[67] sceinture et dicelluy par sur le contrehuys
[68] dicelle maison que tenoit ladite Jehanne
[69] pour icelluy closre et fermer, donna ung
[70] seul coup a icelle Jehanne ne scayt
[71] en quel endroit pourtant qu'il estoit nuyt
[72] et qu'il faisoit obscur a l'occasion duquel
[73] coup qui se trouva environ la poictrine, ainsi <51 recto>
[74] que l'on dit, ladite Jehanne icelle mesme nuyt
[75] par faulte de pansement ou aultrement ala de vie
[76] a deceix. Duquel cas, la femme dudit Le
[77] Comte a obtenu de nous noz lettres d'abolicion
[78] et pardon. Et a l'occasion dicelluy, ledit Le Comte
[79] s'est desoncq puix rendu fugitif. Si nous
[80] remonstrent oultre que ledit Olivier Le Comte
[81] a esté auparavant ledit cas advenu bien vivant
[82] et soy gouvernant sans jamais avoir esté
[83] accusé ne actainct d'aulcun aultre mauvaix
[84] cas digne de reprehencion et qu'il est pouvre
[85] home de mestier, chargé de femme et cinq petitz
[86] enfans, soubz l'aige de neuf ans, qui n'ont
[87] de quoy vivre ; et noze soy reparoir, converser
[88] ne habiter oudit cartier avec sesdits femme et
[89] enfans, doubtant estre apprehendé par justice
[90] et accusé dudit cas. Nous suppliantz qu'il nous
[91] plaise en l'honneur de la Passion de dieu avoir
[92] sur ce esgard et dudit cas luy impartir
[93] et conceder nos lettres de remission et pardon
[94] tres humblement requerant icelles. Pourquoy
[95] nous, etc.

Lescouet

Rémission pour Olivier Le Comte

Registre B34 Lettre n° 11

06/03/1531 [06/03/1532]