13/03/1531 [13/03/1532]
<57 verso>
Remission
pour Julien de Richeboys, la
verifficacion aux juges de Dinan.
[1] Francois,
etc, savoir faisons, nous
avoir receu l'
humble supplicacion
[2] et requeste des parrens
et amys consanguins de Julien de Richeboys,
[3] detenu prinsonnier a
notre court de Dynan pour le cas d'avoir meurdry
[4] et occis ung
nomé Jehan Foulange, dit Chamanre, de la
parroisse de
[5] Saint [?Bria?] ,
Contenant que comme le
huitieme jour de febvrier
derroin
[6] ledit de Richeboys qui estoit lors
et longtemps
auparavant et
[7] encores a
present est troublé et aliené de son
entendement sans
scavoir
[8] la plus part du temps qu'il faict ne dict, fust allé
audit lieu de
[9] Saint Bria en voyaige
* et prier
monseigneur Saint Bria pour luy
[10] estre
intercesseur envers dieu
et luy aider a
avoir et
[11] recouvrer santé
et guerison de sa teste laquelle luy faisoit
[12] fort grant mal
et le vexoit
et tourmentoit,
tellement
[13] que quant fut arryvé a
ladite eglise comme foul et tourné
[14] de cerveau, se mist a sonner les closches dicelle. Apres
[15] quoy s'en alla ches
ledit Foulange tenant lors taverne
audit
[16] bourg pour prandre
et avoir sa resfection ; en
laquelle
[17] maison, il trouva dom Jehan Gueguen, Richard Le Gobien,
[18] Francoys Bregeron, Jehan Locquien
et chacun estans lors
[19] en une chambre haulte qui bevoint
et faisoint grant
[20] bruyt oyant lequel
ledit de Richeboys que
comme
[21] devant lors estoit troublé de son entendement, demanda
[22] qui s'estoit
qui bevoit
et menoit ainsi tel bruyt en
ladite chambre.
[23] A quoy luy fut respondu par aulcuns la estans que s'estoit
[24] le
Sr de La Villeregnaud
et autres
surnomez estans a une
[25] mesme table. Oyant laquelle response,
ledit de Richeboys
[26] incontinent alla en hault en
ladite chambre en laquelle il trouva
ledit de La Villeregnaud et
autres lesqueulx
[27] estoint
assemblez pour
fere quelque
appointement entre
[28] ledit Francois Gueguen
et Jehan Locquien desqueulx
ledit
[29] dom Jehan estoit juge. Et incontinent apres que
[30] ledit de Richeboys fut entré en
ladite chambre, se
[31] mist
et assist a la table ou estoient les dessur
nomez
<58 recto>
[32] et prins ung voire de vin
et dist, adressant ses
parolles
[33] audit dom Jehan Gueguen, Villeregnaud
et chacun et
[34] signantement
audit Villerenaud :
« Mon cousin, je vous
[35] donneroy pinte. » et audit dom Jehan Gueguen qu'il bevoit
[36] a luy d'aultant. Et
apres avoir beu troys ou quatre
[37] foiz
et mangé du pain
et de la chair, dist audit Jehan
[38] Foulange que luy fust allé querir une pinte de vin
[39] et qu'il la voulloit donner
ausditsdom Jehan
et
[40] Villerenaud. Ce que fist
ledit Chamore
et la
presenta sur
[41] la table de par
ledit de Richeboys quel de Richeboys
[42] derechef se print a boire
et deffaict beut
audit Foulange
[43] comme a son amy
et a
plusieurs autres. Apres tout quoy les
[44] dessurdits avoir eu
plusieurs parolles
et devys du faict
[45] et appoincte pour lequel ilz estoint
assemblez,
[46] ledit de Richeboys qui ja avoit quelque peu beu
[47] et estoit eschauffé de vin, dist adreczant
[48] ses parolles
audit Francois Bregeron
par telles ou
[49] semblables parolles :
« Par le sang dieu ! tu es sorcier !
[50] descen de la ! Allon a bas et par mort dieu, je
[51] te tueroy. » Ausquelles
parrolles celuy Francoys
[52] respondit
et dist qu'il n'estoit point sorcier
[53] et derechef celluy de Richeboys se print
[54] a dire
audit dom Jehan :
« Sirs curé, allez querir
[55] du vin. » Auquel de Richeboys,
ledit Foulange, dist :
[56] « Actendez que cest appoincte soit faict et
[57] puis nous auron du vin assez. » En l'endroit
[58] de quoy,
ledit de Villeregnaud dist
audit Foulange :
[59] « Mon compere, oustez-moy cest home ! » et se voyant
[60] ledit de Richeboys se leva de dessus l'escabeau
[61] ou il estoit assis
et print son manteau et
[62] le mist autour de l'un de ses braz mectant la
[63] main dessur son espee
et s'en sortant hors
[64] ladite chambre
[?desscendant?] ;
et descendit deffaict
[65] au-bas de
ladite maison. A laquelle descente,
[66] ledit Soulange print
et bouta
ledit de Richeboys
<58 verso>
[67] fort
rudement tellement qu'il fut bleczé au visage
[68] et le mist hors
ladite maison taschant celluy
Foulange
[69] et ung sien
frere oustez
et ravir l'espee dudit
[70] de Richeboys
et le debastonnez pour
apres ce faict
[71] le baptre
et oultraiger
et de luy
fere a
leur plaisir.
[72] Laquelle espee l'un d'eulx tenoit de peur que
[73] ne la eust evaginee
et lors
ledit de Richeboys
[74] soy escrya leur
disant :
« Lessez-moy ! je ne vous
[75] demande riens. » Ce
neantzmoins le tenans tous deux
[76] sans le vouloir
aulchunement lascher les ungs
[77] au poil
et l'autre au corps
tellement qu'ilz s'entre-
[78] abatirent sur une piecze de boys estant hors
[79] au-devant
ladite maison et ce voyant ledit
[80] de Richeboys estre ainsi malmené et
[81] qu'ilz estoint deux sur luy, craignant estre plus
[82] oultrageusement baptu, voyant
qu'ilz le
empeschoint
[83] de povoir evaginer
sadite espee, trouva faczon
[84] de tirer ung cousteau poinctu
qu'il avoit
[85] lors en une gaisne le long de l'une de ses
[86] cuisses
et de malle adventure, ne penczant
[87] touteffoiz en
fere aulchun meurtre, en frappa
[88] et donna deux coups audit Follange dont
[89] l'un estoit soubz la
mammelle du costé
senestre
[90] dont incontinent par faulte de bon
pensement ou
[91] autrement celluy Foullange alla de vie a deceix
[92] sans
estre confessé fors que
ledit dom Jehan luy
[93] donna une benediction. Ouquel
conflict et debat
[94] ledit de Richeboys perdit
et luy fut desrobé son bonnet
[95] qui bien valloit ung escu ou
environ et
[96] incontinent apres fut
ledit de Richeboys par
[97] les assistans prins
et saesy ou corps et
[98] mené a noz prinsons de Dynan esquelles il
[99] a esté depuis detenu en grant calamyté et
[100] mysere et par noz officiers
dudit Dynan,
interrogé
[101] et vers luy le
proces decrecté. A laquelle
interrogaction
[102] liberallement congneut
et confessa
avoir faict ledit
[103] meurtre
et groya
* et voulut croire des
charpentiers
<59 recto>
[104] qui estoint a besongner de leur mestier ches
ledit Foulange
[105] et aultres surnomez aussi leur
repondit qu'il avoit nom
[106] Rolland qu'estoit
pourtant bien a demonstrer qu'il estoit
[107] foul et tourné de teste. Apres tout quoy luy a esté
[108] la torture ajugee, laquelle il a soufferte sans
[109] confesser aultre chose que ce que davant. Nous
[110] remonstrant que
ledit de Richeboys est pouvre
[111] juvigneur
[?cayant?], ne possedant aulcuns biens,
[112] actaignant de lignaige a
plusieurs bons
et notables
[113] gentilzhomes, dames
et damoyselles de ce pays
et duché,
[114] bien famé
et renommé sans jamais
avoir esté actainct
[115] ne reprins d'aulcun mauveix cas digne de
reprehencion
[116] jucq au cas de
present, et que
ledit Foulange estoit tenu
[117] et reputé
notoirement maulveix
et dangereux paillart
[118] bapteur de gens, yvrougne, coustumiez de jurer et
[119] blaphemer le nom de dieu. Ce
neantzmoins, ilz
doubtent
[120] et craignent
lesdits supplians que
par raison
dudit cas
nosdits
[121] officiers
dudit Dynan veillent vers
ledit de Richeboys
[122] proceder a rigueur de justice qui leur cedderoit
[123] a grant scandalle
et deshonneur et a ceste
cause
[124] nous ont supplyé
et requis qu'il nous plaise
[125] avoir esgard a la
fureur et perturbacion d'entendement
[126] en quoy est
ledit de Richeboys entaché, et
dudit
[127] cas luy
impartir noz
lettres de grace et
[128] remission tres
humblement le nous requerant.
[129] Pourquoy nous,
etc.
Darande