Lettre n° 15

28/03/1531 [28/03/1532]

<67 recto>
[1] Francois, etc, a tous presens et a venir, savoir faisons, nous
[2] avoir receue l'humble supplicacion et requeste des parens
[3] et amys consanguins de notre subgect Guillaume Soly, filz Jehan
[4] Soly de la parroisse de Liffré, Contenant que vingt deux
[5] ou vingt troys ans ou environ icelluy Soly et ung nommé
[6] Guillaume Robert, tabellion et cordeur de terre, se
[7] trouverent a ung jour de feste a boyre a Liffré en la
[8] maison de feu Guillaume Cholleu. Et comme ilz
[9] bevoint, sourdit entreulx parrolles et differant
[10] pour raison d'une obligacion que ledit Robert disoit
[11] avoir sur le pere dudit Soly et s'entredonnant
[12] menaces ; et par apres prindrent ensemble chemyn
[13] pour s'en aller droict au villaige de La Buzardiere
[14] ou ilz estoint lors demourans a distance du bourg
[15] de Liffré d'un quart de lieue ou environ, a partir
[16] du chemyn allerent ovecq eulx eulx[sic] Jehan Soly,
[17] Grivel et Guillaume Hernelu. Et en chemynant lesdits Guillaume
[18] Soly et Robert estans eschauffez et emboytez de vin,
[19] s'entredisoint plusieurs parolles de rigueur et menaces
[20] et apres que lesdits Grivel et Hernelu se furent
[21] departiz de leur compaignie, lesdits Guillaume Soly et Robert
[22] s'en allerent ensemblement, tirans leur droict chemin <67 verso>
[23] audit villaige de La Buzardiere et continuans tousiours leursdites
[24] noayse et parolles de rigueur comme ilz furent pres
[25] la maison dudit Robert et en l'endroit qu'il convenoit
[26] qu'ilz departissent d'ensemble pour s'en aller chacun a sa
[27] maison. Et tost apres qu'ilz furent departiz, ledit
[28] Guillaume Soly, esmeu et eschauffé contre ledit Robert,
[29] couroussé des parolles qu'ilz s'entreestoient dictes,
[30] print ung paoul de haye qui illecq pres estoit,
[31] et courut apres ledit Robert et en une petite
[32] venelle* estant pres de sa maison, acousreut ledit
[33] Robert et dudit pan l'en frappa deux ou troys coups
[34] sur la teste tellement que ledit Robert tomba contre
[35] terre estant bleczé et navré a effuzion de sang
[36] et estoit lors nuict fermee. A l'occasion desquelz
[37] coups a dempuis ledit Guillaume Soly ouy dire que
[38] dedans deux ou troys jours apres ledit Robert
[39] estoit allé de vie a deces. A raison de quoy,
[40] ledit Soly se rendit fugitif hors cestuy notredit
[41] pays et duché, et se retira en notre royaulme
[42] ou deppendance dicelluy ouquel il s'est depuis marié
[43] et soy est tenu jucques a presens huict jours qu'il
[44] estoit retourné en cestuy notredit pays et
[45] par les enfans dudit Robert a esté dudit cas acusé
[46] et constitué prinsonnier es prinsons de notredite court
[47] de Sainct Aulbin du Cormier, et doubte qu'on
[48] veille proceder contre luy a rigueur de justice. Nous
[49] remonstrans lesdits supplians que ledit Guillaume Soly
[50] est vieil et ancien, et aigé de environ cinquante
[51] ans et que auparavant ledit cas et depuis n'a faict
[52] ne comis aulcun aultre cas reprochable, ains avoit et a
[53] tousiours bien et honnestement vescu et a ceste
[54] cause nous ont supplyé et requis a tout ce avoir
[55] esgard et en honneur de la Passion notre
[56] Sr, remectre et pardonner ledit cas audit Soly
[57] suppliant tres humblement nous requerant. Pourquoy
[58] nous, etc.

Morice

Rémission pour Guillaume Soly

Registre B34 Lettre n° 15

28/03/1531 [28/03/1532]