Lettre n° 30

12/06/1532

<119 recto>
Remission pour Robin Dean, la verificacion au seneschal
de Foulgeres.
[1] Francois, etc, a tous presents et advenir, salut. Savoir faisons, nous avoir
[2] receu l'humble supplicacion et requeste des parens et amys consanguins
[3] de Robin Dean, jeune home de le age de vingt cinq ans ou envyron, de
[4] la paroisse de Fougeal en cest evesché de Rennes, chargé de femme
[5] et ung ensfant, a present detenu prisonnier es prisons de notre court
[6] d'Entran de l'auctorité de noz officiers de Bazoges, Exposans que a
[7] ung jour de mardy y a eu le jour et feste monseigneur Saint Jacques
[8] et Saint Phelippes dernier, ung an envyron, l'heure de midi dudit jour,
[9] alla ledit Dean de sa maison situee en ladite paroisse de Foulgeal
[10] soubz la juridicion de Bazoges, membre deppendent de notre baronye de
[11] Foulgeres, en ung jardrin et herbregement pour garder que les ouaseaulx
[12] et bestes n'eussent gasté du chanvre et bledz qu'il y avoit peu de
[13] temps auparavant ensemancez oudit jardrin ayant avec luy une
[14] arbalestre bandee avec troictz pour tirer aux ouaseaulx
[15] tant [?matratz?] que autres troictz comme vires ou garotz. Et il <119 verso>
[16] estant oudit jardrin, ouyt grand bruyt de gens en sa
[17] maison et sa femme cryez a l'ayde et a la force par deulx ou troys
[18] foiz. A raison de quoy, il fut grandement esmeu et eschausfé et
[19] hativement s'en alla a sadite maison ayant sadite arbalestre bandee
[20] et une vire ferree dessus, et il arryvé en la court et au-devant
[21] de sa maison, veid et aperceut ung sien frere nommé Jehan Dean
[22] le jeune qu'il presumoit estre soy hargneulx et malveillant, arrivé
[23] du departement des biens et lettres de la succession de leur feu mere,
[24] estant en sa compagnye ung autre homme audit Robin Dean
[25] incongneu, estranger de ce pays de Bretaigne, nommé come ont ouy
[26] dire lesdits suplians, Guyon de La Noé de Pontorson, garniz chacun
[27] d'eux d'espee, pognard ou mendores esvaginez faisant contenance
[28] de aller vers la personne dudit Robin pour l'outraiger. Quoy voyant,
[29] ledit Robin Dean, estonné de avoir ouy le cry de force faict par sadite
[30] femme, et ayant crainte estre par eulx outraigé ou mys a
[31] mort, se destourna ledit Robin, pregnant fuitte a s'en aller
[32] autrepart que a sadite maison et en soy destournant lascha et
[33] debanda sadite arbalestre et du troit de vire estant sur
[34] icelle attaignit ledit de La Noé en l'endroit de l'estomac. A raison
[35] duquel coup, deux ou troys jours apres alla celuy de la Noé de
[36] vie a deceix. Outre nous ont remonstré lesdits suplians que ledit Robin
[37] Dean estoit au temps dudit cas advenu de bon rest et gouvernement,
[38] bien famé et renommé sans avoir esté actainct ne convaincu
[39] d'aucun cas digne de reproche autre que le cas de present. A raison
[40] duquel nosdits officiers de Basoges veullent proceder vers ledit Robin
[41] Dean a rigueur de justice si par nous ne luy est sur ce imparty
[42] noz lettres de grace, remission et pardon et que tres humblement
[43] lesdits parents et amys nous ont supplié et requis. Pourquoy
[44] nous, etc.

Mandart

Rémission pour Robin Dean

Registre B34 Lettre n° 30

12/06/1532