Lettre n° 37

03/07/1532

<136 verso>
Remission pour Loys de Lesnerac, la verification
au seneschal de Nantes, dont la teneur ensuilt.
[1] Francois, etc, a tous presens et avenir, savoir faisons, nous avoir receu
[2] l'humble supplicacion et requeste des parens et amys consanguins
[3] de Loys de Lesnerac, pouvre gentilhome, Contenant que au moys de may derroin
[4] a ung jour de lundy il se seroit trouvé ou bourg de Saint Nicolas ou
[5] quartier de Redon. Et après y avoir beu et faict bonne chere avec
[6] plusieurs personnes come envyron l'heure de soulleil couchant, ala ledit
[7] de Lesnerac a la demourance de la veufve de deffunct Gilles Quenille,
[8] tenante vin en vante audit bourg de Saint Nicolas avec luy estant
[9] ung nomme Pierres Guerin, merchant, demourant ou villaige de
[10] Cachouet, et Pierres Jouneaulx de la paroisse de Avezac sur espoir
[11] de se y donner du vin l'un a l'autre. Et eulx estant en
[12] ladite maison, sourdirent parolles entre ledit de Leznerac et ung nommé
[13] Geffroy Boterel, homme roturier et portable quel estoit en ladite
[14] maison pour le fere assavoir d'un plegement que ledit Botherel avoit
[15] faict savoir audit de Lesnerac de non prandre ne excecuter ses biens ;
[16] entre lesquelles parolles luy dist ledit de Lesnerac : « Tu ses bien que tu
[17] me doibs mon argent ! Soyez sur que je seroy bien payer. » Et de faict
[18] estoit ledit Boterel debturier * audit de Lesnerac par raison d'une ferme
[19] d'un moullin que avoyt ledit Botherel tenu dudit de Lesnerac ; lesquelles
[20] parolles ainsi dictes par ledit de Lesnerac en desprisant ledit de Lesnerac,
[21] respondit celluy Boterel par telles parolles : « Vous ne jouyrez pas de moi
[22] et n'en ferez a votre guise ! » Et sur ce commancerent a avoir parolles
[23] de noyse et debat l'un a l'autre. Quoy voyant l'un desdits nommés
[24] de ladite compaignye dist audit de Lesnerac que fusent allez
[25] a la maison de Macé Novel estante oudit bourg et que en icelle
[26] il donneroit ung pot de vin audit de Lesnerac. A quoy s'acorda ledit
[27] de Lesnerac cuidant eviter plus grand differend avec ledit Boterel
[28] et sortirent hors la maison de ladite veufve lesdits de Lesnerac,
[29] Guerin et Jouneaulx, et en icelle laisserent ledit Boterel,
[30] prindrent chemyn a aller a la maison dudit Novel et tout
[31] incontinent qu'ilz furent hors ladite maison estans esloignez
[32] de l'huys dicelle d'envyron ung grand gect de paller, ledit
[33] Botherel s'en sortit et yssut hors la demourance de ladite veufve
[34] et estans pres l'huys dicelle, se print a dire a haulte <137 recto>
[35] voix par telles ou semblables parolles : « Fouy, fouy de ceulx qui
[36] mal me veillent ! bran pour eulx et pour Loys de Lesnerac ! »
[37] Et ainsi ou par telles parolles le crya et hucha par plusieurs foiz.
[38] Et estant ledit de Lesnerac deplesant desdites parolles il qui estoit
[39] eschauffé de vin s'en retourna tout incontinent eschausfé vers
[40] ledit Boterel, tira l'espee qu'il porta a son cousté et en donna
[41] audit Botherel deux ou troys coups dont l'attaignit sur la
[42] teste l'un desquelz se trouva de taille tellement qu'il blecza
[43] ledit Boterel en la teste et en hault du visaige et lors
[44] ledit Boterel se print a fuyr et rentra en la maison
[45] de ladite veufve de Quenille en laquelle il faisoit
[46] bien trouble a raison de la nuyct qui se aprochoit.
[47] Et ledit de Lesnerac quel estoit irrité et desplesant
[48] des parolles que luy avoit dict ledit Botherel et que l'un deubst
[49] son bien, suyvit ledit Boterel en ladite maison, luy donna
[50] de sadite espee ung coup d'estoc dont il le attaignit entre
[51] les deux espaulles. A raison desquelz coups est
[52] venu a congnoissance ausdits suplians que ledit Botherel
[53] bien tost apres estoit allé de vie a deceix. Au moyen
[54] de quoy craignent lesdits suplians que l'on veille vers ledit
[55] de Lesnerac proceder a rigueur de justice par forban
[56] ou autrement, si par nous ne luy est sur ce imparty
[57] nos lettres de grace et remission, nous requerant
[58] tre humblement icelles. Pour quoy nous, etc.

Pelerin

Registre B34 Lettre n° 37

03/07/1532