Copyright (c) 1999 by Nicole Dufournaud
Cette transcription a été réalisée par Nicole Dufournaud pour son mémoire de maîtrise et est consultable à l'URL suivant : http://nicole.dufournaud.net/remission/. Si vous utilisez ce document pour une publication, prière de référencer le mémoire de maîtrise et si vous l'utilisez en ligne, prière de référencer l'URL du document.
This transcription has been done by Nicole Dufournaud for her Master's Thesis and is available at: http://nicole.dufournaud.net/remission/. If you use this document for a publication, please add the Master's Thesis in the citations; if you use it online, please reference this URL.

---

10/08/1532

<164 verso>
Remission pour Alexandre Aubree, la verificacion
au seneschal de Vennes.
[1] Francois, etc, savoir faisons a tous presens et advenir,
[2] nous avoir receu l'humble suplicacion et requeste
[3] des gens et amys consanguyns de Alexandre Aubree
[4] de la paroisse d'Aulneville en Normandie, pouvre jeune
[5] home, boullangier, de le age de xxv ans ou envyron,
[6] serviteur du maistre boulanger de la maison de notredit
[7] filz le dauphin, Contenant que le samady tiers jour de ce
[8] present moys, ainsi come ledit Aubree estoit allé a noz
[9] moulins de ceste ville de Vennes, appelles Les Moulins
[10] au Duc, et y faict porter du forment pour moudre
[11] pour fere pain a servir a la maison notredit filz, trouva
[12] illecques ung jeune garson qu'il ne congnoissoit <165 recto>
[13] qu'il a depuys ouyr nommer Allain Legruyer auquel
[14] ledit Aubree dist par telles ou semblables parolles : « Vien ca !
[15] Vien creublé* ou nettyé* mon blé ! » Auquel ledit
[16] Allain respondit : « Donnez-moy de l'argent ou donnez-
[17] moy quelque chose ! » Sur quoy ledit Aubree qui avoit
[18] haste de fere mouldre sadite farine, despit que ledit Allain
[19] ne faisoit conpte de ce qu'il luy disoit, donna
[20] audit Allain ung coup de poingn clos sus la teste,
[21] deux ou troys autres coups sur le cousté gauche
[22] et ung autre sus l'estoumac ; a raison desquelz
[23] ledit Allain alla de vie a deceix celluy mesmes jour
[24] envyron huit heures du soir. Si nous ont outre
[25] remonstré lesdits supplians que entre ledit Aubree et
[26] ledit Allain Legruyer n'y avoit oncques eu querelle,
[27] debat ny differant et n'avoynt eu congnoissance
[28] l'un de l'autre et que ledit Aubree est jeune homme
[29] bien vivant et savant en sondit mestier sans jamais
[30] avoir esté actaint ne convaincu d'aucun mauvaix cas
[31] fors de celluy de present luy advenu par malle fortune
[32] sans avoir eu esperance que estimé que a cause desdits
[33] coups ledit Legruyer fut decebdé. Nous supliant
[34] lesdits exposans qu'il nous plaise dudit cas luy impartir
[35] noz lettres de grace, remission et pardon, tres humblement,
[36] le nous requerant. Pour quoy nous, etc.

Mandart