Lettre n° 52

28/08/1532

<175 verso>
Remission pour Jehan Lebrun, habitant
de Vennes, la verifficacion aux juges de Vennes.
[1] Francois, etc, a tous presens et advenir, nous avoir receu
[2] l'humble supplicacion et requeste des parens
[3] et amys de notre subgect Jehan Lebrun, habitant
[4] de Vennes, Contenant que ung jour de vendredi
[5] depuix ung an encza autrement du temps ne
[6] luy recorde, vint et arriva en ladite ville
[7] a Vennes, ung jeune garson lacquays appellé
[8] Charles Mahé et s'adressa audit suppliant
[9] estant en la maison sa mere ou logieix
[10] ou pend pour ensegne le lion d'or,
[11] auquel lacquays ledit Lebrun vendit
[12] une espee le pris d'un escu. Et pour ce
[13] que icelluy Lebrun veid et aperceut que icelluy
[14] lacquays avoit sur luy plusieurs pieczes
[15] d'or et se doubta qu'il les avoit desrobees
[16] a quelque ung, au moien de quoy
[17] incontinant ledit Lebrun soy transporta
[18] par devers ung nomé Jehan Deslandes, sergent
[19] dudit Vennes, et luy racompta par telles
[20] ou semblables parolles : « Il y a en ceste ville
[21] ung jeune lacquays auquel j'ay vendu
[22] une espee qui a sur luy plusieurs et grant numbre
[23] de pieces d'or. Il seroit bon de le prandre
[24] et de l'en desaisir, car je me doubte qu'il
[25] les a desrobees. » Laquelle chose entendue
[26] par ledit Deslandes promptement avecq ledit
[27] Lebrun en la maison de ung nomé Jehan
[28] Morel aussi sergent dudit Vennes en
[29] laquelle ilz penczoint trouver ledit lacquays,
[30] et illecques arrivez, demanderent a la femme <176 recto>
[31] dudit Morel s'il y avoit point leans* ung jeune
[32] lacquays. A quoy leur fut respondu par ladite
[33] femme qu'il y avoit esté mais s'en estoit sorty
[34] et ne scavoit la parrt qui avoit tyré.
[35] Quoy voyant lesdits Lebrun et Deslandes
[36] s'en allerent sercher ledit lacquays au lieu
[37] appellé A la petite ripviere, les ladite ville
[38] de Vennes ouquel lieu ne le trouverent
[39] et s'en retournerent a la maison dudit Morel. Et
[40] bientost apres y arriva ledit lacquays et
[41] monterent avecq luy en une chambre haulte
[42] dicelle maison en laquelle se trouverent incontinent
[43] ledit Morel, Anthoine Bergeron
[44] et Jacques Chevalier aussi sergents dudit Vennes
[45] qui demanderent audit lacquays ou il avoit eu les
[46] pieczes d'or qu'il avoit sur luy. Lequel respondit
[47] qu'il les avoit prinses et desrobees a ung sien
[48] maistre sans le voulloir nommer qu'il avoit longtemps
[49] servy et ne le avoit satiffere ne poyer de ses sallaires .
[50] Apres lesquelles parrolles, ledit Lebrun avecq
[51] les dessur nomez commancerent mesmes ledit Des
[52] Landes a sercher sur ledit lacquays et trouverent
[53] en sa possession le numbre de quarante pieczes
[54] d'or, savoir est trante huit escucz tant solleil
[55] que a la couronne et ung angelot et demy angelot,
[56] lesquelles pieczes d'or ledit Deslandes osta audit
[57] lacquays et les garda jucques au soir dudit
[58] jour que ledit Lebrun, Bergeron, Morel
[59] et Chevalier vindrent en la maison dudit
[60] Morel soupper. Et apres avoir souppé tous
[61] ensemble, ilz partirent* lesdites pieczes d'or fors
[62] ung escu et troys testous qu'ilz lesserent et rendirent audit
[63] lacquays pour s'en aller et en eut et print ledit <176 verso>
[64] Lebrun sept escuz pour sa part et les autres
[65] aultant, avecq intencion touteffoiz que s'il
[66] s'en faisoit poursuilte et venoit celluy a qui
[67] ledit lacquays les avoit desrobez de rendre
[68] ce qu'il en avoit eu. Et peu de temps
[69] apres, vindrent audit Vennes aulcuns se
[70] avouans serviteur de maistre Geffroy Henry, alloué
[71] de Guingamp, faisans poursuilte de recouvrer
[72] ce que ledit lacquays avoit desrobé audit
[73] alloué son maistre. Auquel alloué ou a sesdits
[74] gens, incontinant ledit Lebrun adverty de leur
[75] poursuilte fist rendre et restituer ladite some
[76] de sept escuz avecq certains froiz, interestz
[77] et despens qu'il disoit avoir faictz a poursuilte
[78] en recouvrement desdites pieczes d'or. Et en
[79] a appoincté et accordé avecq ledit alloué,
[80] lequel a quicté ledit Lebrun de tout ce que
[81] dessur en tant que ce luy touchoit. Si
[82] nous ont requis lesdits supplians
[83] qu'il nous plaise de notre begnigne grace
[84] impartir et accorder dudit cas, remission et pardon audit
[85] Lebrun actandu qu'il a rendu ce qu'il en eut
[86] et que la partie l'en a quicté. Aussi qu'il
[87] est jeune home de bonne vie et honneste
[88] conversacion sans jamais avoir esté
[89] reprins, actainct ne convaincu d'aulcun
[90] autre villain cas, blasme ou reproche
[91] ne faict chose digne de reprehension.
[92] Et sur ce luy pourveoir de notre grace, remission
[93] et pardon, tres humblement le nous requerant.
[94] Pour quoy nous, lesdites choses considerees, etc.

Registre B34 Lettre n° 52

28/08/1532