Lettre n° 54

31/08/1532

<178 verso>
[1] Francois, etc, savoir faisons, a tous presens et a venir, nous
[2] avoir receu l'humble supplicacion et requeste
[3] de notre subgect Guillaume Boudier, pouvre home
[4] de labeur de la parroisse de Corsnuptz, Contenant que
[5] le jour et feste de la penthecouste derniere <179 recto>
[6] comme ledit suppliant fust allé a ladite eglise
[7] de Corsnuptz pour ouyr la messe et service divin
[8] comme bon et vroy catholicque, apres avoir
[9] ouy messe, sortit hors ladite eglise, se
[10] arresta quelque peu de temps ou cimitiere
[11] dicelle a raison qu'il estoit collection du fouage,
[12] taille et [?saille?] sur les parroissiens dicelle
[13] parroisse de Corsnuptz. Et ainsi y estant,
[14] se adressa a luy dom Guillaume Cheny, prebtre
[15] de ladite parroisse, a la priere duquel et pour la grant
[16] amytié que avoient auparavant ensemble,
[17] delibererent d'aller desiuner et prandre leur
[18] refection a la maison Jehan Vallet le jeune
[19] tenant taverne pres dudit cimitiere, entrerent
[20] en une chambre de ladite maison ou costé
[21] du bourg dicelle avecq eulx dom Pierres
[22] Cheny et ung nomé Bienasses, furent servis
[23] de pain, vin et autres pictances faisans ensemblement
[24] bonne chere. Et a eulx se rendirent ungs
[25] nomez Julien Benoist, Julien Greffier et ung
[26] appellé Garnier quelz se arresterent
[27] a boire en leur compaignie. Et apres avoir
[28] esté par quelque espace de temps en ladite
[29] chambre venans assemblement, se y trouverent
[30] parreillement Loys Bazille et sa femme lesquelz
[31] furent doulcement recuilliz par ledit
[32] dom Guillaume Cheny appellant celle femme
[33] sa cousine, ce que deffaict estoit, et icelle
[34] fist se seoirs pres de luy et de l'autre costé
[35] de la table estoit ledit suppliant assis. Et
[36] apres avoir beu et faict assemblement bonne chere
[37] tellement qu'ilz estoient quelque peu eschauffez
[38] et prins de vin, sans touteffoiz avoir parrolles de <179 verso>
[39] debat ne querelle les ungs aux aultres, mais
[40] faisoit ledit Cheny bonne chere a la femme dudit
[41] Bazille sa cousine, la baisant et acollant
[42] et advint que ledit suppliant sans touteffois
[43] penser en aulcun mal, il qui estoit
[44] eschauffé de vin, comme dit est, appella ledit
[45] Cheny : « Foutoux* ! » De quoy celluy Cheny se
[46] courroucza et irrita grandement. Et lors
[47] ledit suppliant esmeu et eschauffé, despita
[48] ledit Cheny disant qu'il ne craignoit quel
[49] son chien. Et bientost apres celles
[50] parrolles, ledit Cheny delivré de ses mains,
[51] donna une grande collee sur la face
[52] et visaige dudit suppliant et pareillement ledit
[53] Bazille qui tenoit le party dudit Cheny,
[54] incontinent apres luy donna autre coup
[55] sur la face et visaige et prindrent lors
[56] lesdits Bazille et Cheny au poil ledit suppliant
[57] et luy eulx pareillement, mays tirerent
[58] ledit suppliant de celle puissance et force que
[59] enclinerent la teste contre la table
[60] ou ilz estoint faisant ledit suppliant cry de force.
[61] Et estant ledit suppliant esmeu et eschauffé
[62] des oultrages et violence ainsi luy faictz,
[63] apres avoir [?sours et levé?] sa teste, trouva
[64] sur ladite ladite[sic] table ung petit cousteau
[65] tranchepain lequel il print et de grande roidez
[66] de la poincte dicelluy donna une
[67] seulle collee. De quoy par cas de fortune,
[68] il actaignit ledit dom Guillaume Cheny en la poictrine
[69] pres la mamelle, et apres celluy coup <180 recto>
[70] donné, s'enfuyt et sortit hors ledit suppliant
[71] de ladite maison. Au moien duquel coup ledit
[72] Cheny ala bientost apres de vie a
[73] trespas. Et craignant ledit suppliant rigueur
[74] de justice, se seroit absenté et rendu fugitif
[75] dudit cartier. Et depuix faisant notre tres cher
[76] et tres amé filz le dauphin deviennoys duc
[77] proprietaire de cedit pays son entree
[78] et couronnement en ceste notre ville de Rennes,
[79] ledit suppliant liberallement s'est mis es prinsons
[80] de notre court dudit Rennes et dicelles mis
[81] hors et temps luy baillé pour de nous
[82] obtenir lettres de grace et remission pour
[83] ledit cas, nous suppliant tres humblement icelles
[84] luy impartir et conceder. Pour quoy, etc.

Pelerin

Registre B34 Lettre n° 54

31/08/1532