Lettre n° 56

07/09/1532

<184 verso>
Remission pour Jehanne Couche, femme de Michel Dubreil, et
Francoys Dubreil, fils desdits
Michel et Jehanne, la verifficacion aux juges de
Rennes dont la teneur ensuilt.
[1] Francois, etc, savoir faisons, nous avoir receu l'humble
[2] supplicacion et requeste des parens et amys consanguins
[3] de Jehanne Couche, femme de Michel Dubreil, de l'age de
[4] soixante et dix ans ou environ, et de Francoys Dubreil,
[5] filz desdits Michel et Jehanne, de la parroisse de Rollandrieu
[6] en la juridicion du regaille de Dol, pouvres gens vivans
[7] de labeur, Contenant que le vendredy xxiiime jour d'aoust
[8] dernier et quequessoit a ung jour dicelluy moys,
[9] environ unze heures du matin, ladite Jehanne
[10] et ledit Francois Dubreil, sondit filz, furent advertiz
[11] que en une piecze de terre apartenant ausdit Michel
[12] Dubreil et Jehanne sa femme, sise en ladite parroisse
[13] de Rollandreu, nommee Les champs de [?Nintellien?],
[14] ensemencee de blé noir, y avoir quatre bestes
[15] porchines qui apartenoint a Olivier Pournaire. A raison
[16] de quoy, ledit Francois Dubreil et ladite Jehanne, sa mere,
[17] partirent de leur maison quelle est a distance
[18] de ladite piecze de terre d'environ deux troictz
[19] d'arbalestre, ledit Francois estant garny d'un
[20] voulge* sur son espaulle et une cougnee convenable
[21] pour hayer* et estouper* ledit bled, ladite Jehanne
[22] garnie d'une faucille pour seer* blé et d'un baston
[23] de boys pour s'appouyer, elle qui est vielle feme
[24] et caducque*. En laquelle piecze de blé noir, trouverent
[25] lesdites quatre bestes porchines apartenant audit Pournaire ; et
[26] ainsi que lesdits mere et filz voulurent prandre lesdites
[27] bestes et les emmener en parc en leurdite maison, <185 recto>
[28] arriva ledit Pournoire quel se mist au devant
[29] et empescha de fere ladite prinse et emparchement
[30] desdites bestes ; et sur ce, sourdit entreulx parolles injurieuses
[31] sur lesquelles ledit Francois Dubreil quel est assez debille
[32] d'entendement et de cerveau, donna ung coup dudit vouge
[33] audit Pournoire sur la temple ou costé gausche et
[34] dicelluy coup fist une playe en la teste dudit Pournoire
[35] de longueur d'environ ung doy. A raison de quoy y eut effusion
[36] de sang et cheut ledit Pournacre par terre ou bas du
[37] fossé de ladite piecze et luy ainsi choist, ledit Dubreil
[38] et sadite mere donnerent audit Pournaire sur le dos
[39] et autres endroitz de son corps aucuns coups du plat dudit
[40] voulge et baston de ladite Jehanne, tellement que il estoit
[41] meurtry et saignoit par plusieurs endroitz de son corps.
[42] Et laisserent ledit Pournaire oudit foussé choist
[43] et s'en allerent amasser leurs bestes et avoirs* qui
[44] estoint en une piecze de terre jouxte ledit blé noir
[45] et enmenerent leursdites bestes en leurdite maison. Et environ
[46] quatre heures apres midy dudit jour, ouyrent dire en
[47] leurdite maison a ung barbier nomé Joachin Boger qui
[48] venoit de penser ledit Pounoire que icelluy Pournoire
[49] estoit en sa maison en son lict bien malade et en
[50] danger de mort. Et a l'interrogacion que furent lesdits
[51] mere et filz audit barbier qui se avoit esté qui avoit
[52] ainsi blecé et batu ledit Pournoire, respondit ledit Bourgier, barbier,
[53] que l'on disoit que se avoient esté ladite Jehanne et
[54] Francoys son filz. A quoy respondirent que ilz n'avoint
[55] veu du jour ledit Pournoire. Et en la nuyt dudit jour, environ
[56] deux heures apres mynuyt, furent advertiz que a l'occasion
[57] desdits excex par eulx faictz audit Pournoire, il estoit
[58] allé de vie a deces. A raison de quoy ont esté lesdits
[59] mere et filz constituez prinsonniers es prinsons de la court
[60] de Dol sur la plaincte fecte le jour dudit exceix de Guillemecte <185 verso>
[61] Goupil, veufve dudit Pournoire. Et le landemain, qu'estoit
[62] samedi xxiiii dudit moys d'aougst derroin a instance de Geffroy
[63] Lorieul, procureur de ladite court de Dol, furent ladite
[64] Jehanne et sondit filz separement interrogez au chatau dudit
[65] Dol touchant ledit cas par maitres René de Saint Melene,
[66] alloué de ladite court, et Pierres Marie, lieutenant, sur
[67] les motifs et advertissement leur baillez dudit procureur ;
[68] a laquelle interrogation lesdits mere et filz denyerent avoir
[69] esté presens et participans dudit homicide, ne avoir veu
[70] ledit Pournoire le jour dudit conflict. Et dempuix
[71] scavoir le mardy xxviime jour dudit moys d'aoust,
[72] a ladite court de Dol, furent faictz venir lesdits mere
[73] et filz davant ledit Pierres Marie, lieutenant, tenant
[74] la chaire, et dudit procureur de Dol fut vers eulx
[75] supposé le cas et homicide dessur [??], veu
[76] les enquestes de ce faictes, interrogacions et variacions
[77] decrect de proces luy estre faict a fin criminelle et estre
[78] pour lesdits mere et filz procedé par voye de inquisition et torture
[79] laquelle a l'oppinion de la court fut ajugee ausdits mere
[80] et filz. Si nous ont oultre lesdits supplians remonstré que
[81] ledit Francois et ladite Jehanne, sa mere, ont esté auparavant
[82] ledit cas leur avenu de malle fortune et non prepensé, de bon
[83] rest et gouvernement, bien famez et renomez sans avoir esté
[84] actainctz ne convaincuz d'aulcun autre mauvaix cas
[85] blasme ou reproche jucques a celuy de present duquel
[86] lesdits suplians nous ont tres humblement supplyé et requis,
[87] impartir ausdits mere et filz noz lettres de grace, remission
[88] et pardon. Pour quoy nous, etc.

Mandart

Registre B34 Lettre n° 56

07/09/1532