Lettre n° 59

14/09/1532

<192 verso>
Remission pour Jehan Jourdan de Foulgeres,
la verifficacion aux juges dudit Foulgeres.
[1] Francois, etc, a tous presens et a venir, Salut. Savoir faisons, nous avoir receu
[2] l'humble supplicacion et requeste des parens et amys consanguins
[3] de Jehan Jourdan chargé de femme et enfans demourant soubz
[4] notre juridicion de Foulgeres, Contenant que puis cinq ans
[5] et auparavant quatre ans derniers, ung nomé Colas Chappon
[6] estoit serviteur dudit Jourdan et demouroit avec luy. Et
[7] ung soir, apres avoir celluy Chappon souppé en la
[8] maison de sondit maistre qui avoit celluy jour esté a Combour
[9] a ses afferes, sortit icelluy Chappon hors la maison
[10] dudit Jourdan aller au veilloays* a la
[11] maison de Olivier Moaise ou il fut par quelques
[12] temps et jucques a ce que il ouyt ung sublet*.
[13] A raison duquel, ledit Chappon ouvrit l'huys dudit
[14] Moaese et parla a quelques gens que il nomma
[15] a son retour estre le varlet de Guyon Lalu. Et
[16] assez tost apres, ledit Chappon sortit de la maison dudit Moaese
[17] disant aller mener son cheval en champ et qu'il
[18] retourneroit incontinent, ce qu'il ne fist, disant
[19] oultre ledit Chappon que ledit Jourdan estoit
[20] allé au Petit Sainct Aublin vendre des fers de
[21] cheval, ce que n'estoit veritable, ains celluy
[22] Jourdan couscha toute la nuyt en sa maison
[23] sans en departir jucques au lendemain assez
[24] haulte heure. Et durant ladite nuyt, ne retourna
[25] ledit Chappon en la maison dudit Jourdan dont
[26] il, sa femme et serviteur ayant eu congnoissance.
[27] Et le lendemain au matin, ledit Chappon passa
[28] par devant la maison dudit Moaese qui estoit
[29] encores au lict et luy dist qu'il et ledit
[30] Moaese feussent allez tirer de la [?gauge?]
[31] et que les maczons dudit Jourdan qui lors
[32] besoignoint a la maison dicelluy Jourdan en <193 recto>
[33] chommoient combien que encores ledit Chappon
[34] n'eust parlé audit Jourdan. Et ledit jour, lesdits Chappon
[35] et Moaese besougnerent ensemble a tirer de la [?gauge?]
[36] pour fere les chemynees que voulloit fere faire
[37] ledit Jourdan. Si nous ont oultre lesdits supplians
[38] remonstré que celluy jour ou bien tost apres il fut
[39] bruyt et commun regnon* que ung nomé le petit Dutertre
[40] qui avoit bruyt de exposer faulse monnoye qu'il
[41] alloit querir en Normendie, avoit esté trouvé
[42] mort sur le chemyn de la ville d'Entrain a distance
[43] de la maison dudit Jourdan d'environ une lieue et
[44] demie et que ledit Chappon l'avoit mis a mort ; de quoy
[45] il interrogea a parrt icelluy Chappon sondit serviteur
[46] qui apres longues parolles touchant ce, luy confessa
[47] avoir faict ledit homicide celle nuyt et que ce avoit esté
[48] ledit Petit Dutertre qui l'avoit [?asseblé?] ladite nuyt
[49] qu'il estoit ches ledit Moaese et que ilz estoint
[50] d'accord de s'en aller tous deux en Normendie
[51] ou ledit Petit Dutertre avoit dit audit Chappon
[52] qu'il feroit grandement son profilt et qu'il seroit
[53] en brief temps riche, sans luy declairer le
[54] moien. Et que ainsi qu'ilz estoint sur le chemyn
[55] de ladite ville d'Entrain pour aller audit pays de
[56] Normandie, ledit Chappon demanda audit Petit Dutertre
[57] que ilz alloint fere audit Normendie, a quoy icelluy
[58] Dutertre luy respondit que ilz alloint querir de la
[59] faulse monnaie pour la bailler aux gens de Surchamps
[60] qui ne la congnoissoint point et que en ce faisant, ilz
[61] y gaigneroint de quatre grans blancs ung. A quoy
[62] luy dist ledit Chappon que il n'yroit point audit
[63] Normendie a celle cause que si la justice le savoit
[64] qu'il seroit boully et commencza a s'en retourner, ce que
[65] voulut empescherledit Dutertre. A raison de quoy,
[66] s'estoint entre batuz en force, que ledit Chappon avoit
[67] tué ledit Dutertre. Quelle confession ainsi oye <193 verso>
[68] par ledit Jourdan, dist audit Chappon que se il estoit
[69] prins par justice que il seroit pendu et qu'il s'en
[70] fuist, ce que depuis ledit Chappon feist apres
[71] avoir esté par deux ou troys jours caché en la
[72] maison dudit Jourdan qui disoit ne savoir qu'il
[73] estoit devenu pour cuider saulver ledit
[74] Chappon qui avoit esté son serviteur. Plus
[75] nous ont lesdits supplians remonstré que a quelzques
[76] jours apres, aulcuns de ses voysins luy dirent
[77] que les officiers de Foulgeres et Basoges se
[78] vantoint que icelluy Jourdan leur rendroit
[79] ledit Chappon ou ilz le feroint pugnir
[80] corporellement et que l'on disoit qu'il avoit
[81] esté participant dudit cas. A raison qu'il avoit
[82] quelque proces avecques ledit deffunct et qu'ilz
[83] le mectroient en torture. A raison de quoy,
[84] il eut si tres grant peur qu'il se rendit
[85] en franchise et de jour en autre luy donnent
[86] lesdits officiers de Foulgeres et Bazouges menaces
[87] de le prandre, gehayner* et torturer se ilz
[88] le trouvent hors de imunité et franchise.
[89] A raison de quoy, ledit Jourdan est constitué en
[90] merveilleuse craincte et a perdu beaucoup de
[91] ses biens combien qu'il ne fut oncques cause,
[92] moien ne participant dudit homicide et s'en
[93] veult injustement et loyaulment justiffier
[94] par devant telz juges qu'il nous plaira ; et
[95] a esté tousiours ledit Jourdan bien vivant,
[96] de bon rest et gouvernement, sans aulcun reproche.
[97] Nous supplians lesdits exposans impartir desdits cas audit Jourdan
[98] noz lettres de grace, remission et pardon, tres humblement le nous
[99] requerant. Pour quoy nous, etc.

Mandart

Registre B34 Lettre n° 59

14/09/1532