Lettre n° 64

02/10/1532

<204 verso>
Remission pour Jehan Thoumas, la verifficacion
aux juges de Nantes.
[1] Francois, etc, savoir faisons, nous avoir receu
[2] l'humble supplicacion et requeste des parens et amys
[3] consanguins de notre humble subgect Jehan Thoumas,
[4] pouvre home du mestier de cousturerie, Contenant
[5] que le jour et feste de la saincte croix derniere passee y
[6] avoit force et assemblee a Redon en quel lieu
[7] estoit allé ledit Thoumas. Et se trouverent
[8] ensemble ledit Thoumas et ung nomé Jehan Bignet
[9] auquel ledit Thoumas bailla une gedde* et ung
[10] jasson qu'il avoit achapté a ladite foire pour
[11] luy apporter au lieu et parroisse de Severac
[12] en laquelle ledit Thoumas et Bignel estoient
[13] demourans. Et assemblement en la maison de la veufve <205 recto>
[14] Marc Nouel tenant taverne a Saint Nycolas es
[15] forsbourgs de la ville dudit Redon, beurent lesdits
[16] Thoumas et Bignet sans avoir ensemble aulcune querrelle.
[17] Et par apres, partirent pour eulx en aller a leurs
[18] maisons en ladite parroisse de Severac, et sur le
[19] chemyn environ ung village nomé le village
[20] [?du Billot?] en ladite parroisse de Fegreac, demanda ledit
[21] Thoumas audit Bignet qu'il luy eust baillé les gedde
[22] et jasson quelz luy avoit baillez pour apporter, ce que
[23] fist ledit Bignet. Et lors jaczoit qu'il feut presque
[24] nuyt, aperceut ledit Thoumas ledit jasson quel estoit
[25] fendu, et demanda audit Bigneit pourquoy il avoit rompu
[26] ledit jasson. A quoy repondit ledit Bignet : « Que t'en
[27] peult-il challoir ? Ce a esté ma jument qui
[28] m'a gecté a bas ! » disant lors ledit Thoumas audit Bignet
[29] qu'il eust rendu ledit jasson, auquel Thoumas repondit
[30] ledit Bignet : « Par dieu, non feroy ! Je n'ay rien
[31] a toy. » Et lors, se prindrent lesdits Thoumas et Bignet
[32] l'un l'autre, et gecta ledit Bignet icelluy
[33] Thoumas a terre et luy donna plusieurs coups et
[34] collees par plusieurs endroitz de son corps et furent
[35] departiz par ung nommé Nycolas Raoul. Et voyant
[36] ledit Thoumas la femme dudit Bignet a cheval laquelle
[37] le injurioit, luy disant telles parrolles : « Villain
[38] larron ! sorcier ! veulx-tu baptre mon mary ? »
[39] la gecta a terre et la print au poil et luy fut
[40] oster par ledit Nycolas Raoul. Et incontinent
[41] s'approcha ledit Bignet dudit Thoumas
[42] et luy dist : « Sang dieu, villain ! meschant ! Pourquoy as [sic]
[43] baptu ma femme ? » Et d'un baston de boys que
[44] avoit celluy Bignet, frappa ledit Thoumas parr
[45] dessus les espaulles par plusieurs foiz. Et lors ledit Thoumas <205 verso>
[46] craignant estre plus greffvement excedé, evagina
[47] son cousteau et de celluy en frappa ledit Bignet
[48] au dessus de la mamelle, lequel Bignet
[49] s'escria disant que ledit Thoumas l'avoit tué.
[50] Et incontinent cheut et tomba mort.
[51] Au moien de quoy, ledit Thoumas craignant
[52] rigueur de justice s'enfuyt et absenta. Nous
[53] remonstrans lesdits supplians que lors d'un
[54] conflict, ledit Thoumas estoit prins et eschauffé
[55] de vin, et auparavant ledit cas, ainsi de malle
[56] fortune, il estoit de bon rest et gouvernement
[57] sans jamais avoir esté accusé d'aulcun autre
[58] maulvays cas, hantant et frequentant les
[59] gens de bien. Nous supplians sesdits parens
[60] et amys qu'il nous plaise a tout ce que dessus
[61] avoir esgard, et dudit cas impartir audit
[62] Jehan Thoumas noz lettres de grace, remission
[63] et pardon, tres humblement le nous
[64] requerant, pour quoy, etc.

Darande

Registre B34 Lettre n° 64

02/10/1532