Lettre n° 68

13/11/1532

<222 recto>
Remission pour Bertran Guerin de la parroisse
de Medreac, la verifficacion aux juges de Rennes.
[1] Francoys, etc, a tous presens et a venir, savoir faisons
[2] nous avoir receu l'humble supplicacion et requeste des
[3] parens et amys consanguins de notre pouvre subgect Bertran
[4] Guerin, pouvre homme de labeur, demourant en la parroisse <222 verso>
[5] de Medreac ou ressort de notre juridicion de Rennes, Contenant
[6] leur estre venu a congnoissance que puis ung an et
[7] auparavant la cuillecte des blez de l'an present, comme
[8] ledit Guerin au matin d'un jour eust prins chemyn
[9] de sa maison pour aller a la metairie de la Villegeloart
[10] sur espoir de avoir et recouvrer quelque argent
[11] que Jehan Rollant, methaier dudit lieu, luy devoit.
[12] Et comme il fut en la rabine* de ladite methairie,
[13] rencontra ung nomé Allain Hune quel est marié
[14] o la fille dudit Rolland qui alloit avecq une seille*
[15] querrir de l'eau a une pompe et fontaine estantes en la court
[16] dudit lieu de la Villegelouart. Et eulx arrivez en ladite
[17] court, veyrent et aperceurent l'huys de la salle
[18] dudit lieu qui estoit ouvert, se transporterent lesdits
[19] Guerin et Hune a l'huys dicelle salle en laquelle ilz
[20] trouverent ledit Jehan Rolland et sa femme ausquelz
[21] ceulx Guerin et Hune demanderent qu'ilz faisoint
[22] en ladite salle. A quoy lesdits mariez respondirent
[23] qu'ilz en avoint les clefz ensemble des greniers dudit
[24] lieu esquelz greniers lesdits mariez, Guerin et Hune
[25] monterent ensemblement et y trouverent grant
[26] nombre de blez dont celluy Guerin du consentement desdits
[27] mariez print et avecq luy emporta furtivement* au
[28] sceu et congnoissance touteffoiz desdits mariez quatre
[29] bouexeaux froment, mesure de Becherel, et
[30] laissa lesdits mariez et Hune esdits greniers. Et lors qu'il
[31] fut arrivé en sa maison, a ce que sa femme luy demanda
[32] ou il avoit prins ledit bled, il repondit qu'il l'avoit
[33] achapté d'avec ledit Jehan Rolland. Apres lequel
[34] emport de blez, quelque temps apres, a esté par les
[35] officiers de la court de Becherel procedé a enqueste
[36] dudit cas, et apres icelles faictes a esté prinse de
[37] corps sur ledit Guerin decrecter en vertu de quoy a esté
[38] mis et constitué prinsonnier es prinsons de notre court
[39] de Rennes ou il a esté par lesdits officiers de Becherel
[40] sur le touchant ledit faict interrogé, et a liberallement
[41] confessé ledit meffaict ; au moien de quoy craignent et doubtent
[42] lesdits supplians que l'on veillent vers ledit Guerin proceder
[43] a rigueur de justice. Nous remonstrans oultre <223 recto>
[44] lesdits supplians que celluy Guerin est jeune home de l'asge
[45] d'environ vingt cinq ans chargé de femme et troys
[46] petiz enfans quelz n'ont de quoy vivre si non par le moien
[47] et labeur dudit Guerin quel a esté detenu par l'espace
[48] de troys moys ou environ esdites prinsons en grosse pouvreté
[49] et misere, et estre ledit Guerin bien famé et renommé au
[50] pais sans jamais avoir esté actainct ne convaincu
[51] d'aulcun villain cas digne de reproche jucques ou cas de present.
[52] Et si l'on procedoit a rigueur de justice contre ledit
[53] Guerin, ce cedderoit au grant scandal, vitupere et
[54] deshonneur desdits supplians lesquelz nous ont
[55] tres humblement supplyé et requis qu'il nous plaise impartir
[56] audit Guerin nos lettres de grace et remission dudit cas
[57] sur ce convenables. Pour quoy nous, etc.

Pelerin

Registre B34 Lettre n° 68

13/11/1532