Lettre n° 78

13/12/1532

<247 recto>
Remission pour Thebaud Jamyn de la
parroisse du Tail, la verifficacion aux juges
de Rennes.
[1] Francois, etc, a tous presens et a venir, savoir faisons nous
[2] avoir receu l'humble supplicacion et requeste de
[3] notre pouvre subgect Thebaud Jamyn de la parroisse
[4] du Tail, Contenant que le jour et feste saint Lorens
[5] en l'an mil cinq cens trante ung, allapresmedy
[6] dicelluy jour, il se trouva en la compaignie
[7] d'un nomé Emery Mannoir quelz ensemblement
[8] allerent boyre en la maison d'une nommee
[9] Andree de Montallembert lors tenant vin
[10] en vente audit lieu du Tail sur espoir de <247 verso>
[11] composer de la faulche que avoit fecte ledit suppliant
[12] pour ledit Mannoir a la methairie du Boullay
[13] ou estoit ledit Mannoir, mestayer. Et comme
[14] ainsi estant a boire en une chambre en laquelle
[15] estoient aussi a boire en une autre table
[16] Jehan Morel, greffier de la court du Tail,
[17] Jacques Bourgonniere, Jacques Viel, Jehan
[18] Corde et plusieurs autres, survint en ladite chambre,
[19] ung nommé Bertran Mannoir ayant une arbalestre
[20] bandee et ung matraz dessus lequel a son
[21] arrivee adreczant ses parrolles a ung nomé
[22] Jehan Denise dist par telles parolles : « L'on m'a
[23] dit que tu te plains d'avoir perdu une
[24] tasse d'estain ! Il fault scavoir la verité. »
[25] Et en disant celles parrolles ou equivallentes,
[26] frappa ledit ledit[sic] Bertran deux ou troys coups
[27] sur les joues dudit Denise. Quoy voyant ledit
[28] Denise s'enfuyt et yssit hors ladite
[29] chambre. Et incontinent se leverent
[30] de la table ou estoint a boire lesdits Emery
[31] Mannoir qui est frere germain dudit Bertran
[32] et ledit suppliant ayant ung petit maillot* en
[33] sa main de la grosseur d'environ deux poings.
[34] Et comme ledit suppliant sortoit de ladite chambre
[35] en une gallerie estante aupres dicelle,
[36] se y rendit ledit Jacques Viel lequel dist
[37] audit suppliant par telles ou semblables parrolles :« Où va
[38] ce fol ycy ? Es-tu fol ? Que veulx-tu fere de ce maillot ?
[39] Si tu en frappoys ung home, tu le tueroys ! »
[40] A quoy ledit suppliant respondit qu'il
[41] ne luy en povoit challoir et que ledit jour il s'en
[42] eust peu s'irriter. Et sur celles parrolles, y eut
[43] entreulx grant noaise taschans chacun d'eulx <248 recto>
[44] a s'entre frapper. Et en icelluy conflict frappa
[45] ledit suppliant audit Viel ung coup dudit Maillot
[46] en la teste et sur tant furent departiz. Et apres
[47] estre departiz, sur ce que les assistans les reprenoint
[48] d'avoir eu debat, respondit ledit suppliant qu'il
[49] avoit frappé ung bon coup dudit maillot
[50] audit Viel et qu'il luy avoit bien maloché
[51] la teste. Et ce faict, se descendit ledit Viel
[52] lequel compta et paya la despense par luy
[53] fecte a ladite Andree et apres se couscha
[54] celluy Viel qui estoit eschauffé de vin
[55] et se endormit sur une mest estant
[56] en une allee du bas de ladite maison. Et au
[57] resveil, se trouva ledit Vieil fort mallade
[58] et dedans vingt quatre heures apres
[59] alla celluy Viel de vie a trespas. A raison de quoy
[60] par les officiers de la court de Rougé au siege
[61] du Tail a esté ledit suppliant accusé d'avoir esté
[62] cause de la mort dudit Viel et pour ledit cas s'est
[63] tousiours rendu fugitif craignant rigueur
[64] de justice. Et estre ledit suppliant pouvre home
[65] ne possedant que peu de biens et n'ayant
[66] de quoy vivre, si non de ce qu'il peult gaigner
[67] a ses journees et s'estre tousiours en aultres ses afferes
[68] bien gouverné sans jamais avoir esté reprins
[69] de justice. Et auparavant ledit cas advenu
[70] ny avoit eu entre luy et ledit Viel querelle,
[71] debat ne inymitié. Et depuix faisant
[72] notredit filz le dauphin son entree en ceste
[73] notre ville de Rennes, s'estre ledit suppliant
[74] rendu prinsonnier es prinsons dudit Rennes <248 verso>
[75] desquelz il a esté mis hors et temps luy baillé
[76] pour de nous obtenir lettres de grace et
[77] remission dudit cas. Et a ceste cause, nous
[78] a tres humblement supplyé et requis icelles
[79] luy impartir et conceder, pour quoy
[80] nous, etc.

Pelerin

Registre B34 Lettre n° 78

13/12/1532