Lettre n° 79

13/12/1532

<248 verso>
Remission pour Gilles Mallet
de la parroisse de Bonnemain ou diocese
de Dol, la verifficacion aux juges de
Rennes.
[1] Francois, etc, savoir faisons nous avoir
[2] receu l'humble supplicacion et requeste de notre pouvre
[3] subgect Gilles Mallet de la parroisse de Bonnemain ou
[4] diocese de Dol, Contenant que doze ans ou environ,
[5] il se transporta en la ville de Combour a ung
[6] jour de lundy qu'estoit jour de marché audit lieu
[7] pour aulcuns ses afferes. Et apres y avoir vacqué
[8] et [?entendu?] et avoir disné et prins sa reffection
[9] et beu en compaignie de plusieurs personnages dont
[10] n'est a present membré [?des nous?], il estant emboyté
[11] et prins de vin passant au devant du chateau dudit
[12] Combour, trouva nombre de pourceaulx desquels
[13] ledit suppliant print et avecques luy emmena troys
[14] en sa maison et demeurance. Et au lendemain
[15] dudit jour, fist ledit suppliant tuer lesdits troys pourceaux
[16] esperant en fere son profilt. Et deux ou troys
[17] jours apres par la poursuilte que fist et fist fere
[18] Pierres Prudhomme demeurant audit Combour
[19] auquel lesdites bestes pourchines apartenoint,
[20] recouvra icelles bestes et dicelle prinse
[21] avec luy en composa et appoincta ledit supliant.
[22] Et sur l'accusacion que audit suppliant que audit
[23] suppliant fut fecte dudit desrobement de bestes porchines <249 recto>
[24] par le procureur de la court de Combour se rendit fugitif
[25] par quelque temps. Et comme environ ung an
[26] a le procureur dudit Combour par haigne qu'il avoit
[27] [?a?] conceue contre ledit suppliant a accusé ledit
[28] suppliant d'avoir desrobé et prins furtivement plusieurs
[29] chevaulx et jumens et entre autres qu'il avoit
[30] desrobé ung cheval apartenant au mestaier
[31] de La Mare Ferron. Et mesmes que ledit supliant
[32] recelloit et donnoit ayde et support aux
[33] lairrons et brigans et qu'il exposoit en vente les
[34] biens et chevaulx par eulx desrobez et print conclucion
[35] asfin de pugnicion sellon l'exigence des cas.
[36] Desquelz cas ledit suppliant fut devyeur et a
[37] les trouver, fut ledit procureur appoincté a prouve. Et
[38] pour tant que n'y avoit charge susfizante pour
[39] detenir ledit suppliant et que ledit procureur ne povoit
[40] prouver lesdits cas, fut ledit suppliant eslargy de la
[41] prinson ou il estoit constitué parce qu'il promist
[42] et jura a peine d'estre actainct et convaincu desdits
[43] cas et de cent escuz d'or solleil dont il bailla
[44] caution de comparoir aux prochains plectz [??]
[45] que tiendroit le senneschal dudit Combour quelz plectz
[46] ont depuix tenu sans avoir ledit suppliant comparu de
[47] craincte d'estre constitué prinsonnier. Nous
[48] remonstrant oultre ledit suppliant que depuix tout ce
[49] et auparavant lesdits plectz, il se trouva a ung
[50] jour de lundy en la maison et demourance de Guillaume
[51] Johier tenant vin en vente audit Combour en
[52] laquelle ledit suppliant print sa reffection et y fut
[53] par longue espace de temps a boire tellement
[54] qu'il estoit prins et esmeu de vin ; et comme
[55] il se levoit de table print et soy ensaesina <249 verso>
[56] d'une serviecte quelle luy avoit esté baillee pour s'en
[57] servir a disner et icelle mise en la manche de sa
[58] robe et come il descendit de la chambre haulte ou
[59] il avoit prins sadite reffection, fut prinse et trouvé
[60] saisy de ladite serviecte par les serviteurs de ladite maison.
[61] Et dudit cas ensemble de n'avoir comparu ausdit plectz,
[62] ainsi que l'avoit promis a esté ledit suppliant acusé
[63] par le procureur dudit Combour et a son instance apres
[64] plusieurs deffailles, a esté sur ledit suppliant prinse de
[65] corps decrecter. Et craignant ledit suppliant estre
[66] apprehendé de sadite some pour ladite prinse de
[67] pourceaux et serviecte et mesme du deffault
[68] par luy faict de comparoir ausdits plectz ainsi que
[69] l'avoit promis et juré fere, s'est rendu fugitif parr
[70] quelque temps. Et pour avoir et obtenir lettres de grace,
[71] remission lesdits cas se seroit ledit suppliant liberallement presenté
[72] es prinsons de notre court de Rennes a la joyeuse
[73] et nouvelle entree de notredit filz le dauphin en ceste
[74] notredite ville de Rennes quelles luy furent octroyees
[75] et accordees et desdites prisons mys hors pour en avoir
[76] et obtenir noz lettres sur ce requises. Nous suppliant
[77] tres humblement icelles luy conceder et
[78] impartir. Pour quoy nous, etc.

Pelerin

Registre B34 Lettre n° 79

13/12/1532