Lettre n° 82

13/12/1532

<251 recto>
Remission pour Jehan Lomiel, la verifficacion
aux juges de Rennes dont la teneur ensuit.
[1] Francois, etc, a tous presens et a venir, savoir faisons nous avoir
[2] receu l'humble supplicacion et requeste de Jehan Lomiel,
[3] jeune gentilhomme, Contenant que puix troys ans <251 verso>
[4] derniers ou come il estoit allé a la ville d'Aubigné
[5] pour aulcunes ses afferes a ung jour de marché
[6] estant en compaignie d'un sien frere divisans soubz
[7] le porche des maisons qui sont a l'un des costez de
[8] l'eglise et cimitiere dudit lieu, il veid yssir de la
[9] maison et demourance d'un nommé Jehan Daumez,
[10] deffunct Patry Estroubeillon, filz juveigneur
[11] de Bonnabes Estourbeillon, Sr de Brin, ressemblant
[12] estre fort esmeu et eschauffé tenant celluy Patry
[13] une espee nue en ses mains courant vers
[14] le lieu ou s'estoit retiré Artur de Champaigne,
[15] Sr de Chambellé, et ung sien serviteur quelz
[16] on disoit avoir eu parolles de menaces et
[17] querelle o ledit Patry en celle heure en la
[18] maison dudit Daumez. Quoy voyant ledit suppliant
[19] pour obvier* a ce debat qu'il craignoit estre
[20] entre les dessurdits se mist au davent
[21] dudit Patry et de craincte d'estre oultragé
[22] par ledit Patry, tira ledit suppliant son espee qu'il
[23] avoit de coustume porter, sans toutesfoiz
[24] s'efforcez en frapper ledit Patry. Et sur ce, celluy
[25] Patry de premieres parolles demanda audit
[26] suppliant pourquoy il se mectoit au devant de
[27] luy et quel desplaisir il luy voulloit, disant
[28] ledit Patry qu'il tueroit ledit suppliant. Sur lesquelles
[29] parrolles, arriverent lesdits de Champaigné et
[30] sondit serviteur tenans en leurs mains leurs
[31] espees nues qui commencerent a ruer coups
[32] de leursdites espees contre ledit Patry mesmes
[33] ledit suppliant irrité des parolles luy dictes par
[34] ledit Patry voyant que celluy Patry le menaczoit
[35] a tuer, se mist en ayde desdits de Champaigné
[36] et son serviteur a ruer et frapper sur ledit Patry.
[37] Et d'un coup d'estoc, ledit suppliant attaignit ledit <252 recto>
[38] Patry environ le bas du ventre et le blecza a effusion
[39] de sang. Et comme ledit Patry se retiroit vers la
[40] maison dudit Daumez, ledit suppliant le suyvyt et luy
[41] donna deux ou troys coups de plat de sadite espee
[42] sur le corps, a occasion desquelz ledit Patry cheut
[43] a terre pres la maison dudit Daumez. Et apres
[44] estre cheut, derechef ledit suppliant luy donna
[45] ung autre coup de plat de son espee. Et apres ledit
[46] suppliant en soy retirant rencontra en sa voye
[47] audit lieu ledit Bonnabes Estourbillon, pere dudit
[48] Patry, auquel pareillement il donna quelque
[49] coup de plat sur le corps sans touteffoiz le
[50] bleczer a effusion de sang, ce que ledit suppliant
[51] fist de craincte que ledit Bonnabes l'arrestast
[52] et fist detenir. A l'occasion desquelz coups et exces,
[53] celluy jour ledit Patry alla de vie a deceix.
[54] Et de ce, fut procedé a enqueste par notre
[55] court de Rennes et prinse de corps decrectee
[56] sur ledit suppliant et ordonné ses biens estre annotez. Et
[57] craignant rigueur de justice, ledit suppliant qui auparavant
[58] s'estoit tousiours honnestement gouverné sans avoir
[59] esté et reprins d'aulcun villain cas digne de correction,
[60] se seroit rendu fugitif. Et faisant notredit filz
[61] son entree en notre ville de Rennes, se seroit
[62] ledit suppliant liberallement rendu es prinson dudit lieu
[63] desquelles il avoit esté mys hors et temps
[64] luy baillé pour de nous obtenir lettres de grace et
[65] remission dudit cas. Et a ceste cause, nous a
[66] tres humblement supplyé et requis icelles luy octroyer
[67] et impartir. Pour quoy nous, etc.

Pelerin

Registre B34 Lettre n° 82

13/12/1532